Basel Tattoo 07

Handglänggbrächer · Anmeldungsdatum: 04.07.2006 Beiträge: 6 Wohnort: Muttenz BL

Hallo zämme,

ich möcht moll e Gedangge zu däm ganze Tattoo-Hype looswärde. Z'erscht moll möcht ich sage, ass ich de Organisatore wirkligg e Lob muess usspräche, scho im 2. Joor sone Aalass mit sonere Wirkig z' generiere... Chapeau! Es isch toll, ass sich soviel Lüt fyr die Art Drummle begeischtere, und das erscht no in unserer schöne Stadt. Dasch wirkligg super. Aber...

...und jetzt kunnt's: Ganz ehrlig, ich find dä Drummelstil au lessig, ich find die Showiilaage au toll, und ich ka mi au fyr die schöne Uniforme begeischtere. Aber wo um Himmelswille isch dr Bezug zu Basel??? Sorry liebi Tattoo-Fans aber es stöört mi eifach, ass das alles eher wenig mit dr Dambuurekultur uss unserer Stadt z'tue het. Mänggisch ha-n-i s' Gfühl, es wär, wie wenn me wurd in China e Handörgeli-Meeting organisere (natyrligg nit ganzt ärnscht gmeint). Wenn wenigschtens 1 klassischi Nummere uss unserer Dambuureszene im Programm wär (nit Top Secret, wo jo ev. gar nit mitmache), denn könnt mi jo no versöhne, aber so ha-n-i irgendwie e glunges Gfühl bi däm ganze Hype. Und wenn denn no Basel Tourismus und unseri Politprominenz das Ganze dermasse pusht, denn froog ich mi, wie lang's goht, bis dr erscht uss em grosse Kanton meint, an dr Fasnacht laufe mir alli mit Marching Snares und Dudelsegg umme (sorry liebi "Schotte";-). Sogar in unserne Junge Garde frooge die kleine Knirps scho, ebb mer denn au moll so ebbis "Top Secret" lehre. Verstöhnd mi bitte nit falsch. Ich ha au dr Plausch an e huffe verschiidene Drummelstil und ha au scho mängs dörfe ussprobiere. Aber ich weiss nit, eb sich do so langsam ebbis yyschlicht, wo zwar glatt isch, aber eifach nit unbedingt viel mit unserne Basler Kessel z'tue het.

Hoffentligg het jetzt niemer s' Gfühl, ich sig irgend sone verbohrte, niidige Dambuur wo de Lüt d' Freud an däm Tattoo nit mag gönne. Es nimmt mi eifach Wunder, eb ich Dr einzig bi, wo däm ganze mit gmischte Gfühl entgägeträte duet. Aber nomoll: Ich find's toll, ass sich so Masse mit e paar Schlegel und emene Kessel dermasse löhn lo begeischtere. Aber ebbe...mi Bitt ans OK wär: Nit vergässe, wo unseri Wurzle ligge. Me ka nämligg mi unserm Drummelstiil au sensationelli Sache mache!

In däm Sinn wintsch ich em OK und allne Tattoo-Fans e tolle Joorgang 07 und hoff, dass alli uff ihri Köschte kömme. Und viellicht isch jo sogar no e weneli Platz fyr e bescheideni kritischi Bemerkig.

Zämme.

Thomas · Admin Anmeldungsdatum: 29.06.2006 Beiträge: 148 Wohnort: Riehen

Jetz wo das seisch, han y miesse bitz überlege. Scho wo's letscht Joor gheisse het, es gäb e Basel Tattoo, han y bitz gmischti Gfühl gha. Y ha's toll gfunde, ass me so öppis in ere Drummel-Hochburg wött probiere und ass dr Namme Basel dodurch no meh in d Wält use dreit wird. E bitz Stolz han y scho gspürt, um ehrlig z sy. Anderersyts het mi genau das gstört, wo du do asprichsch. Dr Drummelstil, die Uniforme etc. hän nit wirklig vyl mit Basel z tue. Klar sin dyni Visione e bitz überzeichnet, aber es goht in die Richtig. Es isch jo fascht e bitz so wie mit Wiehnachte; hüt fyyrt's e jede, au wenn er kei Ahnig het, was derhinter steggt.

Y dängg au, um Basel wenigschtens e Spur gerächt z wärde, fänd y's no cool, wenn e Basler Nummere (abgseh vo Top Secret) d Glägeheit griegti, an däm Speggdaggel deilznäh. Eifach öppis wo au s Baseler Drummle ka zeige, au wenn's halt e bitz andersch isch als die andere Sache; aber immerhin isch Basel wirgglig bekannt für s Drummle, und denn miesst me jo au könne zeige, was das so isch...
_________________
Décider c'est mourir un peu.

Rötzilisk · Anmeldungsdatum: 11.07.2006 Beiträge: 17 Wohnort: D Hochburg vom Drummle

Leider kann i do nit zuestimme, Jungs.

D Drummlen isch ursprüngligg e Kriegsinschtrumänt und nit für d Basler Fasnacht erfunde worde.

Logisch, dass sich uss däm Ursprung dr Yysatz vo dr Drummlen unterschiidligg entwigglet het. Und das isch s tollen am Basel Tattoo. Es zeigt uff wievyyl verschiideni Arte d Drummlen yygsetzt wärde ka. Klassischi Basler Drummle sin übrigens vorko im 06 - und zwar bim Schwiizer Armeespiel und in dr Eröffnigssequänz wo en einzelne Dambuur dr Zapfestreich drummlet het.

S Basler Drummle het während drei Dääg im Johr sy eigeni Show. Vo däm här brucht's das nit no am Basel Tattoo. E Harlekin mit ere Büxen am Ranze, d Mätzli drummelnd würd au nit ins Bild vo däre Veraastaltig passe. Ich sälber drummle vier verschiedeni Stil und i ka euch verspräche: Me vergisst nit wo d Wurzle sin.

Ich ka mir sogar vorstelle, dass d Existänz vo Top Secret, etc. vyylne Jungen e Motivazioon git, meh z'drummle und besser welle z'wärde! Das isch guet. Das brucht's. Unseri Fasnacht het nämmlig e Nochwuggsproblem - nit wäge andere Drummelstil, nei wäge dr Zerstörig vo den "alte" Wärt und Tradizioone. Es isch nüm cool, Fasnacht z'mache, me macht nüt oder goht go snowboarde. Villicht hälfe so Events s Drummle, d Folklore als Gsamts wieder populärer z'mache!!

Also stand i däre ganze Sach sehr, sehr positiv gegenüber. Think about.

Handglänggbrächer · Anmeldungsdatum: 04.07.2006 Beiträge: 6 Wohnort: Muttenz BL

Hallo rötzilisk,

natyrligg hesch Du rächt, wenn schlussamänd s' Basler und s' "Tattoo"-Drummle e gmeinsami Härkunft händ. Wobi sich unsere Stil wohl eher an französische Wurzle orientiert. Und ich glaub Dir au, dass Du Dir bi Dine huffe Drummelstil über Dini Wurzle ganz fescht im klare bisch. Allerdings ha-n-ich eifach mini Zwiifel, eb do au e 08/15 Tattoo-Bsuecher/in ka unterscheide. Mini Befürchtig - und uss mim perseenlige Umfäld halt au scho Beobachtig - isch eifach, dass do e Huffe ebbe tragischerwyys dängge: "Hee, dasch jo viel e töllers Drummle, als das langwyylige Geklopfe an dr Fasnacht..." Froog moll nur all die Pfyffer, wo begeischtert vom Tattoo zrugg kömme ;-).

Und ich stimm Dir au vollkomme zue, dass mer in de Gligge e Nochwuchsproblem händ. Ich verstand nit, wie s' Comité ständig s' Gägeteil behauptet, aber dasch e anders Problem. Wo-n-ich Dir aber ganz fescht muess widerspräche isch die Theorie mit der Motivation durch sone Tattoo. Denn das isch ebbe genau s' Problem: Die Kinder/Jugendliche gsehn/ghööre dä Drummelstil vo dene Drumcorps, sind begeisteret, kömme in d' Gligge in die erscht Lektion und denn, ...

...nach maximal 3 Lektione kunnt die grossi Ernüchterig: 2. Joor Vortraab? So lang yebe? So langwyyligi Märsch? etc., etc. Ich gib jetzt über 10 Joor drummle, und ha in de letschte paar Joor eifach festgstellt, ass mer, wenn's genauso wiitergoht, gly ärnschthafti Problem wärde kriege. Und genau dorum bi-n-i so skeptisch gegenüber dere Tattoo-/Top-Secret-Euphorie yygstellt. Isch alles wirkligg ganz toll, aber eb's unserer Drummel- und Fasnachtskultur wirkligg ebbis bringt? Ich due's bezwiifle, lo mi aber weissgott gärn vom Gägeteil überzüüge. Und viellicht wärde mer eifach grad alli Züüge vomene fasnächtliche Evolutions-Schuub. Aber trotzdäm isch's mer eifach wichtig, grad in dene Zytte, wo nur no Fortschritt und Zuekunft zelle, und die eigeni kulturelli Vergangeheit gärn belächlet und verdrängt wird, versueche de Kinder und Jugendliche e Stügg Basel z'vermittle und sie sälber zumene Stügg vo dere Kultur z'mache. Wär minere Meinig noch au e Riesebyytraag an d' Integration vo Kinder uss andere Kulture. Tönt jetzt alles scho ziemligg pathetisch, aber ich hoff, Dir verstöönd, was ich wott dermit saage.

Bebbi · Anmeldungsdatum: 04.07.2006 Beiträge: 59 Wohnort: Basel

ich glaub eher, dass das ganze e beryycherig isch. Klar das mit de Junge isch so. Die finde das toll, merke denn abber, dass me für das mehr als nur ei joor brucht. Abber ich gsehs ganze nit als konkurränz zü unserer kultur sondern vilmehr als zuesatz. Denn an De drey scheenschte dääg wird nie s showdrummle so dr renner sy. Drvo bi ich fescht überzügt.